არჩევნები 2024
- გიორგი კანკია
- Jan 12
- 1 min read
Updated: Jun 6
პოლიტიკური პოლარიზაცია თბილისში მდინარე მტკვრის სანაპიროებს მიუყვება
არჩევნების შედეგების საეჭვოობის მიუხედავად, ეს მონაცემები საკმაოდ საინტერესო ტენდენციებს გვიჩვენებს სივრცითი თვალსაზრისით. თბილისი, მრავალი ფაქტორით, ორ ქალაქად იყოფა. როგორც ბოლო არჩევნებმა აჩვენა, ის პოლიტიკურადაც პოლარიზებულია და აქაც ძირითადად, ორ ნაწილად, მდინარე მტკვრის მარჯვენა და მარცხენა სანაპიროებად იყოფა.
თბილისში, ოთხმა ოპოზიციურმა პარტიამ, ჯამში 4%-მდე სხვაობით აჯობა "ქართულ ოცნებას". საარჩევნო უბნების მიხედვით, ხმების განაწილების შედეგებს თუ შევხედავთ, რამდენიმე გამონაკლისის გარდა, პოლიტიკური პოლარიზაცია, მტკვრის სანაპიროებს მიუყვება.
აგრეგირებული მონაცემების მიხედვით, ნათლად იკვეთება ხელისუფლებისა და ოპოზიციის მხარდამჭერთა კლასტერები. მარჯვენა სანაპიროს ცენტრალურ უბნებში, გლდანში და შედარებით, უფრო მცირე მასშტაბით, ნავთლუღსა და ვარკეთილში, თვალშისაცემია ოპოზიციის მომხრეთა კონცენტრაცია. ამის საპირისპიროდ, მარცხენა სანაპიროს მჭიდროდ დასახლებულ უბნებში, "ქართული ოცნების" მომხრეთა რაოდენობა საგრძნობლად მეტია. გარეუბნებში და სააგარაკო დასახლებებშიც "ოცნების" მომხრეები არიან მრავლად.
ხმების რაოდენობის მიხედვით, ოპოზიციის მომხრეები, ქალაქის საზღვრებში, უფრო კომპაქტურადაა კონცენტრირებული. ხაზოვანი კონტურები გვიჩვენებს ოპოზიციის მხარდაჭერის პიკურ ადგილებს ხმების რაოდენობის მიხედვით.
